Mazkur maqolada XX asr Amerika modernizmi kontekstida Uilyam Folkner badiiy poetikasining shakllanish xususiyatlari tahlil qilinadi. Tadqiqotning asosiy e’tibori modernistik adabiyotning an’anaviy realizm poetikasidan farqli jihatlari hamda ushbu xususiyatlarning Folknerning qisqa nasridagi namoyon bo‘lish shakllariga qaratilgan. Tadqiqotda narratsiya, narrativ nuqtai nazar, badiiy vaqt, xronologik fragmentatsiya va psixologik tasvir Folkner poetikasining o‘zaro bog‘liq tarkibiy unsurlari sifatida ko‘rib chiqiladi. Jay Watson, Charles Hannon va Ethan King, Moussa Ahmadian va Leyli Jorfi kabi tadqiqotchilarning ilmiy qarashlari nazariy asos sifatida o‘rganiladi. “O‘t qo‘yuvchi” va “Emili uchun atirgul” hikoyalari esa Folknerning modernistik poetikasini kuzatish uchun asosiy badiiy material sifatida tanlanadi. Tadqiqot natijasida Folknerning badiiy o‘ziga xosligi voqealarni an’anaviy xronologik tartibda bayon qilishdan chekinish bilangina emas, balki narrativ shakl, vaqt va personajning subyektiv idroki o‘rtasidagi murakkab munosabatni tashkil etish bilan belgilanadi, degan xulosaga kelinadi.
Copyrights © 2026